04Viva Puntrémal

Fat agnìr pür dala Fransa
al Burdò e la Sciampagna
e ampìstë ben la pansa
cun al vin ch’a ven d’ an Spagna.
Bagnt al bèch cun al Madera
e afëga debti e guai
an t’ la sc’iüma dal Barbera,
an t’ al Chianti o an t’al Tucai;
ma vin bun cmè chëi d’ Puntrémal
a t’al digh bèl cèr e tund
t’n’i metrè mai pü ansémal
gnanc se t’ sir tüt quant al mund.
E ‘l mangèr i n’è da men,
che turdèi e tëstarë,
coti al dënt e cundì ben,
i en davér roba da rë.
La barbòtla càuda e buna,
cun an mèš al furmài frësch,
la carsënta e la patùna
a n’ i magn fòrsi anca ‘l vesch?
E ch’ a n’ fa arturnèr a cà
par Nadal l’ en propi al voi
d ‘turta d’ èrbi, du spungà
e d’un bun bücér dal soi.
Ma chi tüt è bun e bèl!
Basta sul che t’ dagh ‘nuciàda
al’Ursàr e al munt Bürèl,
dala Siša ala Nunsiàda.
Quand dal ciél la lüna cèra
l’ ambiànch punti, teci, prà
e d’argënt a par la ièra
i è ‘n paéš, chest, ancantà.
E tü t’sent tüt armüšnèr
s’a stramèš al Campanùn
ch’a t’par quasi d’arturnèr
un fiulët cuntent e bun.